Manipur-a Tamenglong district-a Kiku chenna hmun kilkhawr tak pahniha Pathiannia tharum thawhna thlengah hmeichhia telin mi pali a thi a, hliam an awm nual bawk.
Longpi khuaah tu tih hriat loh ralthuam kengte chetnaah hmeichhia telin mi pahnih an thi a. Tlai dar 3:00 vela thlengah hian khaw mi pathumte mamawh lam haw lam beih an ni.
Thite hi Julie Singson leh Thangvel (Roel) Gangte an ni a. Hmeichhe pakhat chin hriat loh a ni bawk.
Western Village Volunteers (WVV)-in thuchhuah an siamah beitute hian khaw laili an pan a; mahse, an lo dang kir thei tih an tar lang a. Singson-i hi fa hring mai tur nia sawiin ‘mihringte, a bikin Kuki Zo laka rawng uchuak taka chetna’ tiin an sawi.
Tollen khuaa mi tu tih hriat lohte chetnaah nupa thah an ni bawk a, a fapain hliam na tak a tuar bawk a, he thil hi zing dar 4:00 vela thleng a ni.
Thite hi Lhingjangai Singsit leh Seineh Singsit an ni a. Kaimai-a awm Assam Rifles-ten buaipuiin Jiribam an panpui laiin an nu zawk, Seineh-i hi a thi veleh a ni.
Kuki-te hian kum 1990 chho tir lama Naga nena an intihbuainaa an hnampui thite sunna ni atan kum tin Pathianni hi Black Day atan an hmang thin a, hemi ni takah beihna chi hnih an tawng a ni.
Thil thlengte hian Manipura kawng pawimawh tak, Imphal leh Jiribam inkalpawhna, National Highway (NH) 37 dunga chengte himna dinhmunin sawi a hlawh lehzual phah hle.
Manipur-a Kuki Civil Society Organisations (CSO) chuan beihna thlengte hi demin chiang takin, tan lam nei lova chhui an phut a. A titute man chhuaha hremna na thei ang ber pek an duh.
Hetih lai hian Kaimai Naga Village Authority pawhin beihna thleng hi demin a titute chu eng pawl nge hriat loh nia sawiin heng lai vela hnam chengte inkara inrinhlelhna leh inthen darhna thlentu a nih thu an sawi.
Village authority hian hnam tinte inbeng daia khawtlanng hruaitute leh CSO-te pawh muanna vawnga inhriat thiamna nei turin an ngen bawk.
Kuki chenna, Tollen leh Longpi hi Tamenglong district-a Tousem leh Nungba sub-division hnuaia awm an ni a. Kaimai pawh hi Tamenglong-a mi tho niin kilometre tam lo takin a dan a, Naga chenna a ni ve thung.
Saikul MLA Kimneo Haokip Hangshing-i chuan thil thleng a dem thu a sawi a, hmeichhia, naupang leh mahni inveng thei lo civil mite beih chu a dawihzepthlak tak zet tih a sawi.