Iran leh Gulf ramte inbiak tumna chu Pathiannia Qeshm Island bula Iranian bungraw phur lawng beih a nih avangin sawn a ni.
Muscat-a inbiakna hi Iran-Oman inrem siamna anga Strait of Hormuz hawn leh dan tur leh an chhehvel dinhmun sawihona tura ruahman a ni.
Omani Foreign Minister Badr Albusaidi-a chuan inbiak chu ‘inrawn khawm hnuah’ sawn a ni tih a sawi a. “Kan chhehvela nghehna leh thawhhona nghet a awm theih nan inbiak ngei erawh tum a ni,” tiin X-ah a tar lang.
Iranian foreign ministry thuneitu sang pawhin Tehran leh Muscat thuneitute chuan an thenawm ram thenkhatte ngen angin inbiak hun chu an sawn hla tih a sawi.
Iran hian a hun thar tuk turin Oman chu ruahmanna siam turin a ti tih a sawi bawk niin AFP-in a tar lang.
Iran leh Oman hian tun hnai khan Strait of Hormuz kaltlangna tur kawng thar siamah inremna an siam niin Tasnim news agency chuan a lo tar lang tawh a. A luhna chu Iranian tuipui a ni vek ang a, a chhuahna erawh Iranian tuipui thenkhatah chauh a ni thung ang.
Ruahmanna kimchang hi Gulf ram dangte nen Oman-a an inbiak hunah pharh tur a ni a. Ruahmanna thar hi Iran-in thla tam tak a lo khar tawh strait hawnna tur a ni lo tih sawi a ni bawk.
Iranian sumdawng lawng hi Pathianni khan Hormuz bulah kah niin Iranian sorkar chanchinbuin a tar lang a. Mi pakhat thiin mi dang paliin hliam an tuar bawk.
Qeshm governor chuan beihna hi ‘hmelma firfiakte tih’ niin a sawi tih Iranian sorkar enkawl, IRNA chuan a tar lang.
UK Maritime Trade Operations agency (UKMTO) pawhin lawng hi Strait of Hormuz-a a kal laiin kah fuh a ni tih a sawi a. Kangmei a chhuak a, thawktute lak chhuah an ni tih an sawi a. Hei hi Iran-in an lawng beih a ni tih a sawi nen a inang em tih erawh finfiah a ni lo.
Tar lan tawh thin angin khawvela tui kawng pawimawh ber zinga mi, Strait of Hormuz hi kumin kum tira US leh Israel tang dunin Iran an beih atang khan Tehran chuan a khar a. Bungraw phurhna buai phahin khawvel pumah tuialhthei leh boruakalhthei man bik phei chu a to phah nasa hle a ni.