Aizawl: Phawngpui-ah utawk species (chi) thar hmuh chhuah a ni a, a hmingah ‘Duttaphrynus phawngpui’ phuah a ni.
Mizoram University-a Department of Zoology Head, Prof. HT Lalremsanga leh faculty, Dr. M. Vabeireiryulai leh an research scholar, Malsawmdawngliana, Amit Kumar Bal leh Vanlalhruaia te chuan state pawn lama an thawhpuite nen Mizorama tlang sang ber Phawngpui National park, Lawngtlai district atangin a pianphung leh DNA te chipchiar tak a an zirchian hnuah Utawk chi thar hmu chhuakin, a hmingah Phawngpui hmingchawiin ‘Duttaphrynus phawngpui’ tiin an phuah.
He zirchianna hi Indonesian scientific journal, Taprobanica vol. 15 chuan September 13, 2026 khan a rawn tlangzarh/published ta a ni.
He Utawk chi thar hi kum 2025-a Phawngpui National Park-a MZU Zoological Research Team te’n research expedition an neihna atanga an hmuhchhuah a ni a. He Utawk hmuchhuaktute zinga mi, Ph.D. scholar, Malsawmdawngliana chuan, “Mizoten utawk kan tih bik Duttaphrynus genus hnuaiah hian khawvel pumhuapah species 23 hmuhchhuah tawh niin, Asia khawmualpui chhim leh chhimchhakah chauhte hmuh an ni a. India-ah species 17 hmuhchhuah tawh niin tun a kan hmuhchhuah thar hi Phawngpui tlang chhip bul hnai, metre 2,144 zeta sang, hnahthel zinga lo tawm niin, an khawsak dan phung leh biology zirchianna mumal engmah a la awm lo a, hetiang tlang sang leh hmun vawt tak mai a hetiang nungcha an lo awm ve reng hi thil awm zen zen lo niin a hlu takzet a, hei hian Mizoram hi nungcha leh thlai chi hrang hrangah a hausakzia a tilang chiang zel a ni,” a ti.
Phawngpui utawk hmuhchhuah chungchangah hian research team-te hian forest department chungah lawmthu an sawi nghal bawk.