Aizawl: Mizoramah hmun dangte rualin Hindi Ni (Hindi Diwas) lawm a ni a, Greenhill Public School, Aizawl buatsaih Hindi Concert, Vana Pa Hall-a neih chu Larsap General (Dr) Vijay Kumar Singh chuan khuallian niin a hmanpui a, Education Minister Dr. Vanlalthlana chu khualzahawm a ni.
Khuallian larsap General (Dr) VK Singh chuan Mizoram talent-te ram pawn leh khawvel hmun danga pho chhuah a nih theih nan tawng dang zir a pawimawh thu sawiin, mahni hnam ziarang leh nunphung hloh si lova hawiher leh hmasawnna tihzau a tul thu a sawi.
Fimkhur taka lehkha zir leh tum sang tak nei tura zirlaite chahin, sorkarin zirna inah ‘Thla khata ni khat Hindi tawng hman ni’ kalpui a tum chu lawmawm a tih thu a sawi bawk.
Khualzahawm Education Minister Dr. Vanlalthlana pawhin India chu tawng leh hnam hrang hrang awmna a nih avangin Hindi thiam chu inbiakpawh leh hna thawh kawnga a awlsam thu a sawi a. Modern Education-ah tawng chu exam atan mai ni lova a taka hmang thei tura zir a ngaih thu sawiin, Mizoram Education Reform Committee rawtna angin guidebook-te pe chhuakin hmalak mek zel a nih thu a sawi.