Aizawl: Tourist leh ram pawna Mizote thawhpui nan Hindi tawng thiam chu a tul tawh hle thu leh chumi ruala Mizo hnam leh culture chim ral a nih loh nan te, mahni Mizo nihna zahpuia Hindi tawng avanga ‘mawng tihsawih vak vak’ tula a hriat loh thu Chief Minister Lalduhoma’n a sawi.
Chief minister hian Mizoram Hindi Prachar Sabha buatsaiha Dawrpui Multipurpose Hall-a Hindi Diwas Day pual inkhawm Thawhtanni-a a hmanpuinaah he thu hi a sawi a. Mizoramah tourist ten an rawn tlawh zing tawh avangin taxi driver, tourist guide, traffic police leh IR Battalion-te tan Hindi thiam chu thil tul zual a nih thu a sawi a. “Tawng thiam chu hmasawnna kawng hrang hrang atan a pawimawh satliah tawh lo va, a tulin a tul takzet tawh a ni,” a ti.
Hindi tawng thiam avanga Mizo culture leh nihna hliap a, awm dan phung danglam vak chu a tul lem lo tiin chief minister chuan a sawi a. Tun anga fimkhur lo taka kal a nih chuan, tawng thiam rualin Mizo hnam leh sakhuana thlengin a chimral hlauh theih avangin fimkhur a ngai tih a sawi.
Mizo culture leh nihna humhim tlat chung pawha tawng dang thiam a theih thu sawiin, Lalduhoma chuan Mizo thuam inbel chung reng pawha Hindi-a zai leh tawng a theih thu a sawi a. Fimkhur taka Mizo culture leh hnamzia humhim chung zela Hindi zir mite pawh zirlai chhunzawm turin a chah a ni.