September 14 kha Hindi Ni a ni a, ramchhung hmun dang rualin Mizoramah pawh chief minister hoin Hindi Ni hi hman a ni.
Chief minister hian Hindi thiam a pawimawhzia leh a tul tak zet tawh thu nasa takin a sawi a, India rama awm kan nih miau avangin a tulna chen a awm bawk.
Mizote pawh kan dai chin leh kan thlen chin a sang zel a, English thiam tak tak kan awm teuh tawh lai hian Hindi thiam lo leh thiam loh avanga harsatna tawh phah kan tam ta hle thung.
Hindi hi India rama tawng pui ber, India ram tawng a nih miau avangin a pawimawh a, thiam pawh kan tum tur a ni bawk.
Hindi thiam kan tum leh duh lutukna lamah hian vai incheia inchei kher erawh a tul lo a, Mizo ni chungin thiam leh nal takin a zir theih a, duh aiin an incheina hi kan la nasa ta mah mah em aw a tih theih.
Kan CM hian hei hi a veiawm thu a rawn sawichhuak ve ta chiah bawk a, kan zavaia ngaihtuah tlan ngai a ni. Kohhranin rawngbawlna ki peng hrang hrang a siam a, Masihi Sangati rawngbawlnate hi a tha in, a hlu hle. Chutih rual erawh chuan he rawngbawlna a kan tel avanga vai incheia inchei fo tur emaw kan ti erawh hi chu ngaihtuah chian ngai tak a ni.
Hindi hi Mizo ni chungin thiam takin a zir theih a, an incheina va entawn a, va tih ve kher a tul lo a, kan hnam incheina leh inthuamna kan neihsate hi hindi zir nan a tawk em em a, vai incheina anga va tih ve kher kha a tul lem lo tih i hre thar teh ang u.