Aizawl: Aizawl DC office buatsaihin ‘Bana Kaih (Handholding) Scheme’ hnuaia CM’s Special Package Phase II (III) dawngtu progress partner 683-te hnenah package semna runpui neih a ni a, line department 12-a aiawhte hnenah certificate sem nghal a ni.
Thawhlehni chawhnu khan Vana Pa Hall-ah sem niin, he huna khuallian Agriculture & Farmers Welfare Minister PC Vanlalruata chuan tanpuina sum pekte chu party thliar lova thlan an nih thu sawiin, dik taka hmang tur leh taimakna leh rinawmna nen dinchhuahpui tum theuh turin mipui a chah.
He hunah hian Group hrang hrang 12 aiawhte hi tanpuina sum pek an ni a; package hi commerce-ah 299 leh AH & Vety-ah 293, horticulture-ah 32, cooperation-ah 13, tourism-ah 13, sericulture-ah pariat, agriculture-ah pali, fisheries-ah paruk, LESDE-ah panga, LR&S-ah pali, sports-ah pahnih leh UD&PA-ah pali, an vaiin mi 683 hnenah sem a ni.
Vanlalrova, Addl. DC chuan he scheme hi a thlawna sum sem mai a nih loh thu leh ‘Project-based’ a nih avanga ruahmanna felfai tak nena hmalak zui tur a nih thu a sawi a. Monitoring team-ten an umzui dawn avangin pawisa hmang tha lo te chu hrem leh peklet tir theih an nih avangin rinawm tak leh tih takzeta thawk turin kuthnathawktute a chah bawk.
Progress Partner pakhat hnenah Rs 50,000 theuh pek an ni a, he tanpuina sum hi installment a awm lovin Direct Benefit Transfer (DBT) hmangin a vaiin an bank account-ah thunsak vek an ni ang.