Aizawl: Mizoram State Policy Coordination Committee (MSPCC) chuan Nilaini chawhma khan Planning & Programme Implementation Committee Room-ah thutkhawmin, Bana Kaih Scheme Phase II hnuaia Chief Minister’s Special Package (CMSP) dilna 910 leh loan component dilna 106 lut mekte an endik.
MSPCC vice chairman, Adviser to Chief Minister Dr. KC Lalmalsawmzauva kaihhruai he thutkhawmah hian implementing department hrang hrang atanga nodal officer-ten dilna lutte report an pe a. Dr KC Lalmalsawmzauva chuan Bana Kaih Scheme hnuaia tanpuina chu a thlawn a sem a nih loh avangin a dawngtu tur thlan kawngah mi rintlak, taima, leh eizawnna atana thiamna hmantlak neite ngei thlan an nih theih nan uluk tak leh fimkhur taka thlitfim a nih a pawimawh thu a sawi.
Bana Kaih Phase I leh II kaltlangin sorkar department leh partner bank-te thawhrah avangin chhungkaw thahnem takin eizawnna ngelnghet an neih phah tawh thu pawh a sawi bawk.
CMSP dilna 910 lut zinga a tam ber chu AH & Vety Department (496) leh Horticulture Department (185) atang an ni a; Loan Component dilna 106 lut pawh MSPCC member-te leh Nodal Officer-ten uluk taka zir chiangin, siam that leh paih ngaite an endik nghal bawk.
Bann Kaih Scheme Phase III hi September ni 18, 2026 atang hian kalpui tan tuma inbuatsaih mek a ni.