Aizawl: ZPM sorkarin Reiek leh Chungtlang peng inkar kawng chhe lutuk an siam tha thei lo nia hriain, Nilaini khan MNF Dampa East Block hmalaknain mi 100 chuang zetin kawng siam thain hnatlang an thawk chhuak.
Aizawl atanga Mizoram khawthlang panna leh tourist hmun pawimawh panna kawng pawimawh tak hi kawng a chhiat em avangin damlo, nu nau leh khualzinte tan veivah a harsat zual bakah Anthurium Festival leh Chhimthlang Presbytery thleng tur atana kawng pawimawh tak a nih thu MNF hian an sawi a. He hnatlangah hian Khawrihnim, Chungtlang, West Lungdar MNF Unit leh Reiek atanga hruaitute chu mahni hmanrua kengin an thawk chhuak a, Dampa bialtu MLA Dr. R. Lalthangliana’n boulder trip eng emaw zat a tumsak.
MNF Dampa East Block chuan kum 15 daih kawngpui tha tiamtu Lalduhoma sorkar leh PWD minister an dem thu sawiin, kawng tha taka ngaihven turin an phut a ni.
PWD Aizawl Road South Division atanga pickup pakhat leh labour 10 vel kawng siam tura an thawk chhuak ve pawh ropui an tih thu leh an chunga an lawm thu an sawi tel bawk.