Aizawl: Social Welfare, Women & Child Development Minister Lalrinpuii chuan Aizawl P&PI Conference Hall-ah National Commission for Women (NCW) leh Mizoram State Commission for Women (MSCW) tangkawp buatsaih, ‘The Mizo Marriage & Inheritance of Property Act, 2014’ siam that tak zirhona, consultation meeting chu khuallian niin a hmanpui.
Lalrinpuii chuan he dan zirhona buatsaih a ni chu lawmawm a tih thu sawiin, Mizo Inneih leh Rokhawmna Dan 2026-a siam that tak chu Mizo mipui, a bikin hmeichhiate dinhmun leh chanvo nghawng thei dan pawimawh tak a nih thu a sawi.
Mizoram sorkarin hmeichhiate dikna leh chanvo humhalh a ngaihpawimawh thu sawiin, nupa inthenna thlengah hmeichhiaten nupa thawhchhuah atanga zaa 50 thleng an hauh ve theihna tur dan siam thatah telh a nih thu a sawi bawk.
Kum 2014 atanga vawiin thlengin hmeichhiat natna leh dikna kaihhnawih case 545 dawng tawhin, chung zinga 535 chu chin fel tawh a nih thu a sawi bawk.
Consultation meeting hi hun thuma then niin, inneih, inthen leh rokhawm chungchangte a mal malin zir ho a ni a, kalkhawmte atanga rawtna hrang hrang lutte chu MSCW hian thlifimin sorkarah an theh lut leh dawn a ni.
He meeting hi MSCW Chairperson C. Zodinpuii chuan kaihruaiin thupui a sawizau a, Technical Session hi Legal Cell Member T. Lalnunsiama’n a kaihruai chhunzawm a, kohhran, tlawmngai pawl hruaitute leh mi thiam sawm bik te an tel a ni.