Mizoram sorkar ngenna leh mipuite harsatna pumpelh a nih theih nan Nilaini atanga hnam dang enkawl petrol pump khar tumna chu Mizo Zirlai Pawl (MZP) chuan a thulh rih a. Hnam dang enkawl petrol pump chungchangah zirlai pawl hian a tul angin hma an la chhunzawm zel dawn tih an sawi.
Nilainia Home Secretary, Vanlalmawia kaihhruaia pawl pahnihte an inbiak hnuah, All Mizoram Petroleum Dealers Association (AMPEDA) chuan MZP laka an thil phutte hnukleta pump khar an tum an thulh hnuah, September 17-a petrol pump khar an lo tum tawh pawh chu MZP chuan an thulh rih a. MZP Headquarters, Sub-Headquarters, Branch leh hnampual zirlai pawl hrang hrangte hnena hriattirna lo chhuah tawh pawh an hnuk kir nghal.
MZP chuan hnam dang enkawl leh Mizo hming hawha sumdawng pung chho zel chu pawi an tih thu an sawi a, hnam dang petrol pump enkawltute chungchangah hian a tul angin hma an la chhunzawm zel dawn tih an sawi a. MZP Assembly lo awm turah ‘Mizo hming hawha hnam dang sumdawn tirte na taka hremna dan sorkarin siam se, a tul anga dap chhuah thin ni rawh se’ tih chu rel tur zingah dah tel niin, a tul angin Assembly rorel bawhzui hian MZP chuan hnamdang sumdawngte dapchhuah kawngah hma ala chhunzawm dawn tih an sawi.
Zirlai pawl hian ram leh hnam himna turin mipuite pawh sum leh paia hlawkna ringawt um lo va, mahni hming leh ramte hnam dang hnenah hawhtir lo turin an ngen a. Sumdawnna atana mahni hming lo hawh tir mekte pawh an hnam dang thawhpuinate titawp vat turin an chah a, hnam dang sumdawng dap chhuah kawngah village/local council leh tlawmngai pawl hrang hrangte thawhpuiah an sawm nghal bawk.