Aizawl: Mizo hnam leh Zoram chhan nana nunna hlantu Martar-te zahna leh chawimawina hlanin, Co-ordination Committee on Ex-MNA Association leh Peace Accord MNF Returnees Association (PAMRA) te chuan kumin Martar Ni pualin Mizo mipui zawng zawngte chibai an buk a. Kumin September 20 hi Pathianni a nih avangin a tukah Martar Ni hi hman tur a nih thu leh, ram leh hnam tana inhlantharna nia hmang theuh turin mipuite an ngen a ni.
CCOEMA leh PAMRA chuan Mizo fate Pathianin a siam chhan anga mahni kea an din chhuah theih nan leh anmahni awpbettute lak ata tal chhuaka rorelna pakhat hnuaia hmun khata hnam an len za theih nan, MNF chuan March 1, 1966 khan Independence a lo puang tawh a. MNF-in zalenna kha lo sual lo phei se chuan, thenawm state-a hnam tlem zawk Tripura, Cachari leh Khasi-te ang maiin mahni ram ngeiah neitu nihna hauh ngam lovin an awm mek tur thu an tar lang.
CCOEMA leh PAMRA chuan Martar-te khan pawl bik emaw, political party bik tan chauh emaw a nun hlan an ni lo va, Mizo hnahthlak zawng zawng tana an nunna hlu tak chu hlan an nih zawk thu an tar lang a. Mizo hnahthlak tawh phawt chuan hnam martar-te hlutna hre renga chawimawi tur leh, an tana inhlanthar ni-a hmang theuh turin Mizo mipui zawng zawng an sawm a ni.