Aizawl: Kawrthah Venglai Branch YMA chuan damloh avanga hun rei tak bawksawp tawh, Lalthanpara te kuhva huan samin Inrinni khan hnatlang a ko va, member 70 chuang thawkin, kuhva huan tin hnih hmun vela zau an sam faisak.
Lalthanpara (Valpuia) hi thingkung atanga chesualin spinal chord a sawh chhia a. Che thei lovin kum eng emaw zat a awm tawh a. Tun hnaiah a nupui, H. Lalmuanpuii chu hrawk cancer a ni tih hmuh chhuah a ni veleh a ni.
An fate zingah a upa berin nupui a nei tih lo chu nula leh tlangval niin a theih ang kawng hrang hrangah eizawnna dapin an inkawl mek a. An dinhmun hria a, an veng branch YMA-in a sum hmuhna hnar pui ber pakhat, kuhva huan an sam faisak chungchangah Valpuia te chhungkua hian lawmthu an sawi a. YMA pawhin hnatlang senso atana thawhlawm thawhtute Kawrthah VC leh mi tlawmngaite hnenah lawmthu an sawi.