Aizawl: Chief Minister Lalduhoma chuan Thawhtanni khan a pisa-ah NITI Aayog-a India hmarchhak bialtu member, Dr. Joram Aniya chu a kawm a, Mizoram hmasawnna tura thil pawimawh hrang hrang leh ruahmanna awmte an sawi dun.
An inkawmnaah hian Chief Minister Lalduhoma chuan Dr. Joram Aniya-in Mizoram a tlawh avangin lawmthu a lo hrilh a, NITI Aayog-a Mizoram sorkar thil thlen thinte ngaihpawimawh a hlawh thin avanga lawmthu sawiin, state hmathlir tihlawhtling turin NITI Aayog thawhpuina chu Mizoram tan mamawh reng a nih thu a sawi.
Dr. Joram Aniya pawhin Mizoram a tlawh chu nuam a tih thu leh NITI Aayog chuan Mizoram hmasawnna tura hmalakna tinrengah Mizoram sorkar a thawhpui tlat zel dawn tih a hrilh a ni.
Mizoramin khualzin tam zawk a dawn zel theihna tur te, Kaladan Multi-Modal Transit Transport Project (KMMTTP) peih a nih huna tangkai taka hman zui a nih theih dan tur te, sawhthing sawngbawlna lama chak zawka hma lak dan tur bakah Mizorama school tam takin Atal Tinkering Labs an hmuh theih dan turte an sawi dun a ni.
Dr. Joram Aniya hi NITI Aayog-in hmarchhak bial tana Aizawla Regional Workshop a buatsaih hmangin Mizoramah hian a cham mek a ni.