BJP Mizoram State President Dr. K. Beichhua, MLA chuan Ayushman Bharat (AB-PMJAY), khawvela hriselna hmalakna (healthcare scheme) lian berte zinga mi kum riat a tlinna pualin Prime Minister Narendra Modi leh India mipuite hnenah lawmpuina a hlan.
Nilaini khan BJP State Office, Mipui Run Upper Republic-ah Dr. K. Beichhua chuan he scheme hian kum riat liam ta chhungin India-a hriselna dinhmun a thlak danglam nasa a, mi tumahin sum leh pai harsatna avanga enkawlna an hmaih loh nan leh mi retheite nun chawikan nan a tangkai hle tih a sawi.
AB-PMJAY kaltlang hian eligible chhungkuate hnenah kum khatah Rs. 5,000,000 thleng damdawi in awm man a thlawn a pek theihna health insurance pek an ni a. Tun thlengin state leh UT hrang hrangah mi vaibelchhia 60-in hmang tawhin chhungkaw tam tak damdawi in senso a hum phah tih a sawi.
BJP Mizoram President chuan Mizoramah scheme hamthatna dawng theiten an dawn ngei theih nana hmalakpui an tum thu sawiin mipuite pawh inzirtirna thehdarh zui tur leh India ram hrisel zawk leh chak zawk siamna kawnga thawhho pui turin a ngen a ni.