Aizawl: Inrinni khan Bawrai khawtlang chuan an veng chhung PWD kawng chhe lai chu vantlang hnatlang buatsaihin an thawm tha. He hnatlangah hian khawtlang mipui an thawkchhuak tha hle a, mi 242 lai an inlawm chhuak a ni.
Khedacherra-Damcherra-Zamuang-Kawrthah-Tuilutkawn (KDZKT) Road, Bawrai Veng (Zawlnuam Town) chhunga kawng hi fur ruah tui tla avangin a chhe nasa hle a, lirthei tang a tam bakah ke a kal tan pawh kal a harsa hle a ni. Hetianga veng chhung kawng dinhmun anih avang hian Bawrai Village Council chuan lung (boulder) trip eng emaw zat leiin, khawtlang mipuite chu hnatlangin a ko ta a ni.
He kawng hi Mizoram, Assam leh Tripura te inkalpawhna kawng pawimawh tak a nih bakah, Langkaih balu phurhchhuahna kawng ber a ni bawk.
KDZKT Mamit District Road, PWD Kanhmun Sub-Division hnuaia patch repair-na tur awm hi tender vat a, kumin thal chhung ngeia kawng thawm that hna hi tan hman a nih theih nan Bawrai Village Council chuan thuneitute an ngen tel bawk a ni.