Aizawl: Prime Minister Narendra Modi-a chuan Mizorama anganwadi centre hrang hranga khawtlang mipuite tanrualna hmanga nutrition chuktuah huan, ‘Nutrition Garden’ siam hmanga intodelhna kalpui dan chu fakawm a tih thu sawiin, he thil tih hi Mizo nun mawi, ‘Tlawmngaihna’ tak tak lantirtu a nih thu a sawi.
Thla tina radio thuchhuah ‘Mann Ki Baat’ episode 138-naah Pathianni khan Prime Minister Modi-a chuan Mizorama khawtlang mipuite tana eitur chinna mual siam hnatlang chungchang hi a tar lang a. He hmalakna hian Mizo nunmawi — mahni inphata mi dang tana hnathawh leh tlawmngaihna hi a entir chiang hle a ni, a ti.
Prime Minister Modi-a chuan he hmalaknaa tel anganwadi worker-te an inpekna leh midang tana rawng an bawlna chu fakawm a tih thu sawiin, tunah hian Poshan Tracker hmangin anganwadi centre-te chu tunlai thiamna khawl changkang zawk hmanga zawm mek an nih thu leh dawrtu nuai 900 lai ziah luh an nih tawh thu a sawi bawk.
He hmalakna avang hian naupang, nu naupai leh naute hnute hnektir mekten enkawlna tha zawk an hmuh phah nia sawiin, “Taksa hrisel lohna leh chaw tha tlakchhamna um zui hna pawhin hma a sawn tak zet a, sorkar pawhin India ram chu chaw tha tlakchhamna laka fihlim tura a theihna zawng zawng a hmang mek a ni,” a ti bawk.
Prime Minister Modi-a hian ‘Mann Ki Baat’-ah hian Mizoram chungchang hi tum hnih a lo sawi tawh a — MP C.L. Ruala leh ‘Save Chite Lui’ campaign (June 26, 2022) chungchang te a lo sawi tawh a ni.
Tuna Nutrition Garden chungchang a sawi hi ‘Mann Ki Baat’ hmanga Mizoram chungchang a sawi tum thumna a ni.