Aizawl: Mizo Language Development Board (MLDB) Chairman R. Lallianzuala leh Secretary Lalsangpuia te chuan Nilaini khan Larsap General (Dr) Vijay Kumar Singh chu Lok Bhavan-ah hmuin, Mizo tawng tihhmasawn nana pawimawh hrang hrangte an sawipui.
Larsap chuan 8th Schedule-a Mizo tawng seng luh a nih thuai theih nan theihtawp chhuahpui a tum thu sawiin, lehkhabu chhuah kawnga MLDB-in an thawhpui atan Sahitya Akademi hotute lo biak a inhuam thu a hrilh bawk.
Inkhawmnaah hian larsap chuan Mizo tawng hmangtute khawvel pumah an inzar pharh zau tawh thu leh Mizoram chu ziak leh chhiar thiam tamna ber state a nih tawh thu a sawi a. Naupang tete leh hnam dang Mizo tawng zirtirte dik taka an lam rik theih dan tura ziak dan zirtir a pawimawh thu a sawipui a ni. MLDB hotute nen Mizo tawng tihhmasawn leh tihlar chhunzawm dan tur hrang hrangte ngun takin an sawi ho chhunzawm a ni.