Aizawl: Land Revenue & Settlement (LR&S) Department bultumin Ramhlun Sport Complex Rehabilitation Centre, H/S Plan huam chhunga chengte hnenah land pass (digitised record of rights) semna hun buatsaih a ni a; he hunah hian LR&S Minister B. Lalchhanzova chu khuallian a niin, bialtu MLA Dr. Vanlalthlana, Education Minister-in a tawiawm.
B. Lalchhanzova chuan mipuiin LR&S Office pan buai ngai lova an kawtkaia land pass te an dawn theihna tura he semna programme hi ruahman a nih thu a sawi a. Tun hi land pass hi a hma aia him, changkang leh bo thei lo a nih thu sawiin mipuite banphaka awm zel turin department-in theihtawp an chhuah thu a sawi.
Rehabilitation Centre hmun hi kum 2013-a Ramhlun Sport Complex leh Ramhlun Vengthar lei min tuarte chhawmdawl nan sorkarin Lalthansanga ram bigha 32.04 a leisak a ni a. Master plan siamin chhiatna tuartute hnena in hmun pek ni tawh mah se, hun rei tak chhung pass pek theih a nih loh bakah local council-ten hmun thenkhat mi mal hnena an lo khultir nual avangin buaina a thleng a. Heng buainate sutkian nan hian December 8-19, 2025 chhung khan GNSS Receiver hmangin survey tihnawn leh vek a ni.
Re-survey atang hian plot 146 hmuh chhuah niin, leimin tuar avanga ram pek 101 leh thlanmual ram sahthlak/siamrem 26, a vaiin ram 127 te chu Nilaini hian land pass pek a ni ta a. A baka LC, NGO leh Kohhranin mi an leisak 15-te chu Land Lease-a siam zui tur niin, dispute pali awm mek pawh chinfel a ni chho mek bawk.
He hunah hian bialtu MLA Dr. Vanlalthlana pawhin thu a sawi a ni.