Kenyan vaukam khawpui, Mombasa panna kawngpuia lirthei chesualah mi 17 vel an thi a, an zinga a tam zawk hi Catholic biakzin, tawngtaina hmun pana kalte an ni.
An khawpui, Nairobi chhimchhak lam km 90 chuanga hla, Salama-a lirthei insutna hi zan laia thleng niin Inrinni khan police-in an sawi.
Truck khalhtuin truck dang lehpelh a tumna lama insu niin hetah hian biakzinte chuanna lirthei pawh an hnawl tel niin police hian an sawi.
Kenyan chanchinbute chuan mi 14 chuan theihna bus tê chi hmanga biakzina kal an ni tih an tar lang.
Van khalhtu leh a mi phurh 16-te chu a hmunah an thi a, a tam zawk hi hmeichhia an ni tih police-in an sawi.
Biakzinte hi Nairobi khawthlang lama Nakuru County-a tawngtaina hmun pana kal an ni tih Catholic Archdiocese of Mombasa Archbishop Martin Kivuva-a chuan a sawi.
President William Ruto-a chuan thi chhungte, an thiante leh an puithiam bakah Catholic kohhran a tawrhpui tak zet thu a sawi.
Kenya-a National Transport & Safety Authority (NTSA) chuan insutna thlen chhan an chhui dawn tih an sawi a. Chhuitute tir tawhin ‘a chhan chiang tak hre turin an ti’ tih an sawi.
Africa khawmualpui pumah kawngpuia lirthei chetsualna hi a tam a. Kenya leh an chhevel hmun dangah pawh lirthei enkawl that loh, tlan chak leh kawng chhiate chu chetsualna thlen chhan bera puh a ni.
Kenya-ah hian nikum khan lirthei chesualah mi 5,009 thi anga chhinchhiah niin kumin kum chawhma lam khan mi 2,150 an thi hman bawk tih NTSA-in a chhinchhiah.