Asian Games 2026-a India tana gold medal latu hockey player pahnih, Lalremsiami Hmar leh Lalthantluangi chu Thawhtanni hian chief minister hovin vantlang huapa hmuah a ni dawn.
Siami leh Tluangi thian dun hi Lengpui Airport-ah Deputy Speaker Lalfamkima hovin sorkar leh sports association, Mizoram Olympic Association (MOA), United Sports Association of Mizoram (USAM) leh Hockey Mizoram aiawhten an lo hmuak hmasa ang.
Asian Games gold medalist hi chawhnu dar 1:30-ah airport atanga chhuakin Hunthar peng atangin Chanmari-ah an kual ang a, Treasury Square atanga Republic Veng leh ITI veng kaltlangin R. Dengthuama Hall an pan ang a, hetah hian Chief Minister Lalduhoma hovin a lawmna neih a ni ang.
R. Dengthuama Hall-a lawmna hunah hian minister leh MLA, sorkar official pawimawhte leh sports association aiawh, MOA, USAM, Thenzawl Hockey Academy, SAI Training Centre Aizawl leh Khelo India State Centre of Excellence (KISCE)-a training te, MJA leh NGO hrang hrang te, college zirlaite bakah a duh apiangte an tel ang.
Siami leh Tluangi hmuah dan tur hi Inrinni khan Sports Minister Lalnghinglova Hmar hovin a office-ah sawrkar hotute leh sports association aiawhten an rel a. Hunthar atanga a lawmna hmun panna kawng dunga awmte chu an awmhmun theuhah lawmna lo lantir turin ngen.
Zirtawpnia Asian Games 2026 hockey hmeichhe final-ah India chuan si khat faia China hnehin an champion a, goal awm chhun hi Kolasib nula, Siami vuak luh a ni nghe nghe.
Zirtawpniah khan Mizoram sorkar chuan Siami leh Tluangi te hi lawmman Rs. nuai 25 ve ve pek an nih tur thu an puang.
Chief Minister Lalduhoma chuan team hlawhtlinnaah lawmpuina a hlan a, a bikin hnehna an chan theih nana theihna sang tak theh chhuaktu, Arjuna Awardee Siami chu a fak hle bawk a. Siami leh Tluangi te chu Asian Games-a Mizoram atanga gold medal la hmasa ber an nih avangin Mizoram tan thil chhinchhiah tlak tak a ni tih a sawi bawk.
“An hlawhtlinna ropui tak chawimawi nan player pahnihte hi tuna kan hman mek, Mizoram Sports Incentives Cash Award Scheme hnuaiah Rs. nuai 25 ve ve pek an ni ang,” tiin chief minister chuan a official social media-ah a tar lang a. An hma lam huna hlawhtlinna nasa zawk an chan theih nan player pahnihte leh Indian hmeichhe hockey team te chu duhsakna a hlan nghal bawk a ni.
Hockey India chuan hmeichhe hockey team-in gold medal an lak avangin player tinte hnenah lawmman Rs. nuai 11 theuh pek an nih tur thu an puang a. Support staff member-te pawh team hlawhtlinnaa an tangkaina kawng hrang hrangte chawimawinan Rs. nuai 5.5 theuh an dawng dawn bawk a ni.