Asian Games 2026-a hockey hmeichhia final-a goal awm chhun vaw luttu, Lalremsiami Hmar chuan gold medal goal a thun chu a thun hlimah kha ti taka mawi kha a ni tih a lo hre lo va, an inkhelh zawh hnuah a hre ve chauh.
Asian Games gold medalist Mizo nula pahnih, Siami leh Lalthantluangi te chu Thawhtanni khan Mizoram an thleng a, Mizoram State Sports Council (MSSC) buatsaihin R. Dengthuama Indoor Stadium, Mualpui, Aizawlah Chief Minister Lalduhoma hovin hmuah an ni.
Inkhawm kaihhruaituin a biakbiaknaah China laka a goal thun chungchang chu Siami chuan, “Kha goal kha a tirah chuan a mawi tih pawh ka lo hre lo va, inkhelh zawha coach-ten a video min entir leh hnuah chauh ka hria a, kei pawhin mawi ka ti,” a ti.
Final-a Asia No. 1 China an hmachhawn dawn khan huphurh bikna an neih loh thu a sawi a, goal thun tum sa bik erawh a ni lo tih a sawi a, “Inkhelh dawn apiangin striker tan chuan goal thun chu kan tum ziah a, final-ah khan thun ngei ngei tum bik erawh ka ni lo va, chance ka hmuh erawh chuan hlah ka tum lo thung,” a ti.
India tan vawi 200 khela goal 52 thun tawh, Siami hian national team-a Mizo player, Tluangi’n a belh chu nuam a ti tih a sawi a, “Ka duhthusam thin a ni,” a ti a. “La awm belh tur pawh an awm hmel a, a phurawm tak zet,” a ti.
India team-a Siami hnung zui tan mek, Kanghmun South nula, Tluangi chuan kawng lo sial tawhtu chuan a pui nasa tak zet tih a sawi ve bawk.
“Khelmual chhung bakah a pawn thleng pawhin Siami hian min pui nasa em em a, ka u, ka pianpui ang mai a ni,” a ti a. “Tihsual ka neih pawhin min hrilh a, kawng engkimah min pui a ni,” a ti.
Mizo nula pahnihin an champion-pui, India hmeichhe hockey team hi Los Angeles Olympic Games 2028 khel turin an tling nghal a, 2018-a Jakarta Asian Games-a silver medal lo la tawh, Siami chuan an hmabakah hian gold an lak theih a beiseiawm tih a sawi.
“Beisei a sang a, team khelh chhoh dan pawh a tha a, gold hi a beiseiawm a ni,” a ti.
Siami leh Tluangi thian dun hi Lengpui Airport-ah Deputy Speaker Lalfamkima hovin sorkar leh sports association, Mizoram Olympic Association (MOA), United Sports Association of Mizoram (USAM) leh Hockey Mizoram aiawhten an lo hmuak hmasa a. Hunthar peng atangin Aizawl khawpui fanpui an ni a, kawng dungah mi tam takin an lo lawm.
R. Dengthuama Hall-a lawmna hunah hian minister leh MLA, sorkar mi pawimawhte leh sports association aiawh, Thenzawl Hockey Academy, SAI Training Centre Aizawl leh Khelo India State Centre of Excellence (KISCE)-a training te, MJA leh tlawmngai pawl hrang hrang aiawh, college zirlaite bakah mi dang tam tak an tel.