Nasa taka nghaisak thalaite an tam zel lai hian kan thalaipui ve tho Remsiami leh Thantluangi te chuan Asian Games 2026-ah India aiawha Hockey khelin gold medal an vawchhuak a, an mimalin an pawisa dawn zawng zawng chu cheng nuai 40 a ni tawh! Hei hi a ni kan chhuan tur leh entawn tur dik takte chu.
An thlen chin hi a nep lo a, an kalkawngah harsatna tam tak an paltlang lo a ni bik lo, an kawng hi a ngil purh bik lo a, mahse an insum thei a, an teirei peih a, an hlawhtlin hnuah hriat a nuamin, ram pumin chawimawi tlak a ti ta bawk.
Thalai tam tak, nu leh pate chawmhlawm ni chunga la pawr ve em em, chhungte phurrit tak tak kan tam takzia hi inngaihtuah ila, thalaite hian entawn tur dik takte hi entawn nachang i hria ang u.
Kan hnam hian mi ropui hi kan ngah tawh a, kan hmaah mihuai tam tak an awm tawh bawk. Tun hnaia mite hian ruihhlo tel lo hian kawng dik zawh kan zir zel a tul a, Siami leh Tluangi chanchin hi min tiharhtu ni mawlh se la, kan thlen chin i tisang zel ang u.
Kan thlah lo la kal lehzel turte tan hian sulhnu leh hnuhma ropui hnutchhiah turin ke pen ila, i insangmar ila, mi fate pawhin an tum a, an sual a, an sualchhuak thei a, i bei ve fat fat hlawm teh ang u. Tuna kan unaute hun tawn thlir chung hian kal ngaihna hre lo tam takte hi harhchhuak thar ila, ke chheh tidik chungin hma lam panin kan thlen chinah hmasawn tumin beisei i tisang sauh sauh bawk ang u. Ruihhlo tel lo hian thalaite hi kan nung thei a ni.