British Indian chess thiam, Bodhana Sivanandan-i chu Zirtawpniah khan Woman Grandmaster (WGM) title dawng thei naupang ber a nihna record chu Guinness World Records-in an pawm.
Kum 11 mi, London zirlai naupang hian kar liam taa Chess Olympiad 46-na neih takah khan chanchin thar siamin, chess-a Woman Grandmaster title la thei naupang ber a ni.
Uzbekistan-a Samarkand khawpuia a hnehna a chan hian kum 10 a nih laia Guinness World Records title pahnih a lo lak tawh hnuah, record thar dang a neih belh leh ta a ni.
He title thar vang hian Bodhana-i hian Guinness World Records title pathum a nei ta a, a hmaa a lo lak tawhte chu ‘Youngest Chess Woman International Master’ leh ‘Youngest Player to Defeat a Grandmaster in a Chess Tournament (Female)’ te an ni.
“Bodhana-i hlawhtlinna thar ber hi Guinness World Records 2027 chhut zawh a nih hnua thleng a nih vangin a title thar hi kum thara lehkhabuah hian a lang hman lo va. Amaherawhchu, a record siam hmasa pahnihte erawh bu tharah hian tar lan a ni,” tiin Guinness World Records chuan an tar lang.
Sivanandan-i hian a hlawhtlinna hmasa pahnihte chhinchhiahna Guinness World Records certificate puitling chu a dawng tawh a, a pathumna hi a dawng leh vat dawn a ni.
“Guinness World Records 2027-a tel hi chawimawina ropui tak a ni a, lawmna thuk tak leh tuina thar min pe a ni. Thleng sang zual tur leh hma sawn belh zel turin min cho thar hle,” tiin Sivanandan-i chuan a sawi.
Chess a luhchilh chhan hi thilpek beisei loh a dawn atanga intan a ni a, board chhunga chess lem pakhat, knight (sakawr) laka a tui chhoh vang a ni. Naupang a nih laiin ‘horsey’ tia a koh sakawr lem khalh hi nuam a ti em em a, a infiamna dangte anga hman a duh thin.
A pa chuan chess set atangin sakawr chauh a lak hrana a lak bo chuan mi dangin intihsiakna an khel thei tawh lo ang tih a hrilhfiah.