Sihhmui to Muallungthu Land Owners Welfare Association chuan Aizawl Bypass Road (Western Side) laih hna kal zelah sorkarin an thil phut hrang hrangte October, 2026 ral hmaa a tihhlawhtlinsak loh chuan November 1 atanga hna thawh chhunzawm tawh loh tura hma lak an tum thu an sawi.
Thawhlehni khan Aizawl Press Club-ah thu thar thehdarhtute kawmin association hruaitute chuan September 26, 2026-a I&PR Auditorium-a ram neitu kalkhawmten assembly-ah zangnadawmna aia land settlement certificate (LSC) thlangte ram tehsak tawh tura an phut bakah quarry neitute rawtna department-a statement an siam tawh anga pawmsak leh pek te, kawng laih a nih zela leivungte dumping ground-ah chauh paih tawh tura phutna te, kawng laih avanga lei min leh leivungin huan thlai a tihchhiatsakte hnenah an phu tawk zangnadawmna pek leh a dawng turte an dawn hmain list tar chhuah ni tawh se tiin resolution an siam tih an sawi a.
Ram neitute chuan zangnadawmna pek leh tur Rs vbc 7.4-te chu October, 2026 ral hmaa sem chhuah vek tura an phut thu sawiin, he an thil phut leh an resolution dangte hi October 31, 2026 thleng sorkarin a tihhlawhtlinsak lo a nih chuan November ni 1, 2026 atang chuan he bypass road laih hna hi a hmunah thawh chhunzawm phal a ni tawh dawn lo tih an sawi.
Association hruaitute chuan PWD-in RTI hmanga tual chhung TV pakhatin zawhna a zawhte a chhan danah dik lo a awm nia sawiin, PWD-in pawisa la dawng lo mi 17 chauh awm tawh anga a sawi leh Rs nuai 98.3 chauh sem tur awm tawh anga a tar lan chu pawm a harsa an tih thu an sawi a. Pawisa dawng lo mi 100 chuang an la awm avangin tun sorkarin Rs vbc 7.4 sanction tur hi sem a tum tawh lo nge tih an zawt a. Sum la dawng lote ‘dawng hman lo’ anga PWD-in a chhang chu ram neitute’n engtik lai pawha an dawn theih reng thu an sawi a ni.