Aizawl: Horticulture Minister C. Lalsawivunga chuan Thawhlehni khan Champhai Zotlang Mual-ah Hnahsin Kût 2026 a hawng a; kût hmang hian ram chhung leh ram pawn atanga khualzin tam tak an lo kal mek chu lawmawm a tih thu sawiin, eco-cultural tourism hmanga Mizo hnam ziarang leh ram mawina pho lan chu Hnahsin Kût tum ber pakhat a nih thu a sawi.
Minister chuan Champhai district-in horticulture sector-a hmasawnna hrang hrang an neihte sawiin, Grape Growers’ Society enkawl, Tlangsam leh Hnahlan winery pahnih atangin kumin chhung ringawt pawh grape wine litre 1,55,000 zet siam chhuah a nih tawh bakah Rs vbc 9.54 lai hlawhchhuah a nih thu a sawi.
New Champhai-ah Sapthei Processing Unit din mek a nih thu leh, Samthang khuain Zikhlum an chin hlawhtlin dan atangin sorkar ngaih pawimawh, ‘Zau Policy’ a hlawhtling hle tih a hmuh theih thu a sawi bawk.
Thlai pawimawh pali zinga sawhthing chinna kawngah Champhai district-in hma a hruai mek a. DoNER ministry thutlukna angin a vawi khatna atan Mualkawi-ah ginger processing unit lian tham leh Zotlang, Vaphai leh Tualcheng te-ah a unit te zawk din a ni dawn a; hei hi mission mode-a kalpui niin ‘Mizo Ginger Mission’ tia vuah a ni dawn tih minister hian a puang a ni.
Central leh state sorkar department hrang hrangte tangkawpa kalpui tur he mission atang hian Hnahsin Kût hlawhtling taka hman a nih theih nan horticulture department chuan Rs nuai 20 an thawh a, kût chhung hian ‘Mizo Ginger Day’ hman a ni dawn bawk.
Nikuma Hnahsin Kût-ah khan khualzin leh tlawhtu mi 1,20,000 vel zet a hip a, Champhai leh a chhehvelah sum che vel Rs nuai 2,000 vel lai a luhtir nia chhut a ni.