Aizawl: Mizoram sorkar ruahmanna angin, October ni 13, 2026-a Mizorama buatsaih tur ‘North East Bankers’ Conclave 3.0 atana inbuatsaihna leh ruahmanna hrang hrang sawi hona chu Nilaini chhun khan New Secretariat Conference Hall, MINECO-ah Chief Secretary Khilli Ram Meena, IAS kaihhruaiin neih a ni.
He Conclave-ah hian Union Minister for Development of North Eastern Region (DoNER) Jyotiraditya Madhavrao Scindia chu khuallian tura beisei a ni a, Northeast state hrang hrang atanga Chief Secretary-te, RBI hotute, State Official leh Bank hrang hrang aiawhte pawh an tel beisei an ni.
Conclave 3.0 buatsaihna thutkhawmah hian Union Minister for DoNER dawnsawn dan tur leh a hmunhma tlawh tur ruahmannate, state pawn atanga sawm bikte thlenna leh lirthei (transportation) buatsaih dan, bakah venhimna (security) lam ruahmannate kimchang takin en ho a ni.
Conclave-a khuallian DoNER Minister hian Mizoram tihhmasawnna tura Project 5 hmachhawp kalpui tanna tur lungphum a phum bakah, Project 5 puitlin tawh te hawnna hun a hmang bawk ang.
Thutkhawmah hian Principal Secretary (GAD), DGP, Commissioner & Secretary-te (Health, Planning, Tourism, PWD), Secretary-te (Agriculture, Horticulture, I&PR, Finance, Cooperation), Aizawl DC, SP leh State Protocol Officer, bakah Mizoram University, NEDFi leh Bank aiawh hrang hrangte an tel a ni.