Aizawl: Land Revenue & Settlement Minister B. Lalchhanzova chuan Project Veng, Kolasib-ah Rs nuai 66.87 senga sak, Assistant Commissioner (Revenue) Quarters thar a hawng.
Nilainia Assistant Commissioner Quarters hawnnaah hian Minister B. Lalchhanzova chuan thu sawiin, Revenue leh District Administration (DC) kal hrang thin chu thil fuh lo tak a nih thu a sawi. Champhai leh Thenzawl-ahte pawh Assistant Commissioner Office hawn tum a nih thu a sawi.
B Lalchhanzova chuan revenue hna chu hmuh theih a langsar ni lo mah se, ram hmasawnna tura lungphum pawimawh tak a nih avangin, revenue department-ah chuan a chung lam atanga ruahmanna siam tawp aiin district level atanga sorkar finchhuah leh Land Pulling System hmanga sorkar leh ram neituten tangkawpa hmunhma an tihhmasawn theih nan ngaihtuahna sen a pawimawh thu a sawi.
Khualzahawm Deputy Speaker Lalfamkima pawhin thu sawiin, ZPM sorkar kum khatna chu leiba rulh leh insiamrem nan hmang mah se hmasawnna hmuh tur a tam hle tih a sawi a. Kolasib Diakkawn leh Venglai Bazar sak that ruahmanna awm tawh bakah, Pangbalkawn-South Chhimluang kawng tender kalpui mek leh Lalremsiami hming chawia Hockey Ground siam tura hmalakna te a sawi bawk.
PWD Technical Report-in a tar lan danin, Quarters hi October 1, 2025-a sak tan niin thla 12 chhungin thawh zawh a ni.
Hawnna inkhawm zawh hian minister hian Kolasib leh Vairengte-a a department hmalakna a hmunah kalin a enfiah nghal bawk.
Minister chuan District Headquarters piah lamah SDO (Civil) thuthmun zawng zawngah revenue thuneihna pek vek tum a nih thu leh Pilot Project atan Vairengte leh Thenzawl thlan an nih thu sawiin, khaw tam zawka Village Revenue Officer (VRO) dah a, mipuite tana dawr nuam leh awlsam ber ni tura hmalak zel a nih tur thu a sawi a ni.