Aizawl: BJP Mizoram chuan Nilaini khan Prime Minister Narendra Modi-a’n Gujarat chief minister a nih atanga vawiin thlenga India leh mipui tana a rawngbawlna kum 25-na (Silver Jubilee) lawmna hmahruai atan ‘Seva Jyoti Yatra’ neiin kawng an zawh.
Kawngzawh hi BJP State Office, Upper Republic atangin Vana Pa Hall kawt thleng neih a ni a, a hmain Modi-a’n live telecast-a a thusawi chu an party pisa, ‘Mipui Rûn’-ah ngaihthlak a ni bawk.
Vana Pa Hall kawta inkhawm tawiah State General Secretary Delson Notlia, MDC-in kaihruaiin State President Dr. K. Beichhua, MLA-in thu a sawi a. India pumin PM Modi-a kum 25 rawngbawlna a lawm thu leh Delhi-a a lawmna pui ber neih rualin state hrang hrangah hun hman a nih thu a sawi a. ‘Seva Sankalp Abhiyan’ puala hun hman mek a nih avangin September 17 atanga October 17, 2026 chhungin party politics dah thain mi dang tana luan chhuahna hun atan hman a ni tiin a sawi.
Dr. K Beichhua chuan mi dang tana luan chhuah program — thawhho leh civil society-te tana thil tha tih, blood donation camp, de-addiction centre leh orphanage home tlawh, bawlhhlawh thenfai leh PM scheme dawngtute tlawhna hunte neih a nih tawh thu leh kalpui zui zel a nih tur thu a sawi a. India ram rawngbawlna hmasawn nan mahni inphat leh midangte tana luanchhuah a pawimawh thu sawiin, ram hruaitu, kohhran leh NGO-te chu inpumpekna rilru nen ke pen za turin a sawm bawk.