Aizawl : Govt. Aizawl North College (GANC) leh Christ University, Bengaluru te tangkawp buatsaih, ni hnih chhung awh tur National Seminar “Youth and Culture in Northeast India: Intersections and Perspectives” chu PHE Minister Prof. Lalnilawma’n Ningani khan a hawng.
GANC-a hawnna inkhawmah Minister chuan hmarchhak chu India ram hmasawnna thlentu pawimawh tak a nih thu leh, hnam leh tawng hrang hrang awm khawm kara inunauna tha tak awm thin chu a hlu hle tih a sawi a. Seminar hi hmun hrang hrang atanga research thawktute inhmuhkhawmna hun tha tak a nih rualin, a hlawhtlinna tur dik tak erawh zirlaite rilru sukthlek a nghawng danah a innghat thu a sawi bawk.
Minister chuan seminar thupui “Youth & Culture” chu tunlai khawvel nena inrem tak a nih thu leh, thalaite’n music, fashion, literature, social media leh khawtlang nun hmanga culture an siam danglam mek thu a sawi a. Social media leh artificial intelligence (AI) te hian thalaite nunah nghawng nasa tak an nei tih sawiin, AI chu tangkai hle mah se thudik lo thehdarh laka fimkhur a tul thu leh, mahni hnam identity leh culture humhalh tlat chunga tunlai khawvel hmasawnna kalpui thiam turin kalkhawmte chu a chah.
Prof. Lalnilawma chuan seminar buatsaihtute chungah lawmthu sawiin, hmarchhak culture humhalhtu leh a tha zawnga danglamna thlentu ni ngei turin thalaite leh kalkhawmte duhsakna a hlan a ni.