Aizawl : Animal Husbandry & Veterinary Minister leh Aizawl South I bialtu MLA C. Lalsawivunga chuan Ningani khan a bial chhunga SASCI leh PWD Aizawl Road South Division ruahmanna hnuaia hmasawnna hnathawh hrang hrangte PWD Engineer-te tawiawmin a hmunah a enfiah.
Bethlehem Veng kawngpui phei zauhna tur leh College Veng, Vengthlang CP Road atanga Aizawl Bypass Road pawh tura SASCI atanga ruahmanna siamte hi enfiahin, Minister chuan mihring leh lirthei pun zel avanga mipuite awlsam zawk nana kawngpui sial leh zauh chu thawh thuai a nih theih nan tan lak chhunzawm zel tur thu leh veng mipuite thawhpui a mamawh thu a sawi.
Kawngpui zauhna leh sialna tur ruahmanna hrang hrangah hian Bethlehem Venga Sih Lui atanga Tuithiang kawng metre 260 a thui zauh tur zau zawng enfel mek niin, College Veng leh Aizawl Bypass link road pawh hna tan thuai a nih nan buaipui mek a ni.
Minister C. Lalsawivunga hian contractor-te nen a bial chhunga kawng chhe lai thawm that turte en nghalin, kumin thal chhunga thawh zawh a beisei thu a sawi a; Bethlehem Veng Hall leh High School sak mek te pawh a tlawh nghal bawk.