Aizawl : Mizoram mipuiin rorelna tha leh dik a awm theihna turin Congress party sorkar tir an tum mek tiin Mizoram Pradesh Congress Committee (MPCC) President Lal Thanzara’n a sawi.
Ningania Aizawl District Congress Committee ruahmannaa Lal Thanhawla Auditorium-a kum 2026-2028 chhunga Aizawl City Block Congress Committee hruaitu tharte lawmpuina hun a hmanpuinaah he thu hi sawiin, Congress party chu dawt sawi ngai lo leh an intiamna tihlawhtling thin party a nih thu leh, India ram hmun hrang hrangah leh Mizoramah ngei pawh Congress nasa takin a thang chho mek a ni, a ti.
He hun hman a nih zawh hian MPCC te chuan India ram democracy tihbawrhbana awm mek duh lohna lantirin Vana Pa Hall kawt atanga Congress Bhavan thlengin “Black Day for Democracy” kawngzawh an neih chhunzawm a ni.
Lal Thanzara chuan inthlan dawn apianga Congress intiamnate chu Pathian khawngaihna zarah tihlawhtling zelin, rangva sem atanga NLUP sem thleng leh remna leh muanna thlengin a hlawhtling zel tih a sawi.
BJP chungchang sawiin, tun hnaia Amit Shah lo kal lo ta mai chu ZPM te nena an inremsiamna tur rokhawlhna a awm vang a nih theih thu sawiin, BJP MLA pakhat chu Deputy CM atan ZPM-in an lakluh ngei a rinawm, a ti bawk.
Kristian nuai chimih tumtu BJP te’n rorelna an chelh rei chuan sakhaw tlem zawkte tan a hlauhawm tih sawiin, Election Commission-a duh lohna awm mekah thalaite an pungkhawm mek a, Election Commission Chairman a ban hma chu nawr zel an tum tih a sawi a. Rahul Gandhi ngei pawh kum 2029 Lok Sabha inthlanpuiah PM a nih ngei beiseina a san thu leh, INDIA Block te nena inthlanna fel leh thianghlim a awm theihna tura an thawhho zel tur thu a sawi bawk.
Kawngzawh tute hian Central-a BJP sorkarin mipui zalenna a rep bet leh Rahul Gandhi laka tharum thawhna te chu nasa takin an dem thu te, leh mipui zalenna rapbettu BJP sorkar bang tura phutin an au rual a ni.