Aizawl: Mizorama thawk hnam dang All India Service (AIS) Officer-te’n Mizo tawng, nunphung leh hnam ziarang an hriatchian zawk theihna tura duan “Training on Mizo Culture, Language, Society and Value System” chu Chief Minister Lalduhoma’n Ningani khan Secretariat Conference Hall-I ah a hawng.
Mipui tana rawngbawl tur chuan an hnam ziarang hriatchian chu thil pawimawh hmasa ber a nih thu sawiin, chief minister chuan Mizorama hetiang training buatsaih vawikhatna a nih avangin a ngaihtuah chhuaktute leh Administrative Training Institute (ATI) thawktute chu fakawm a tih thu a sawi.
Chief minister chuan ram inrelbawlna tha leh hlawhtling nei turin dan leh policy zam ringawt a tawk lo va, mipuiin neitu nihna rilru an put a tul thu a sawi a. Mipui leh sorkar inrintawnna leh inpawhna tha siam tur leh an harsatnate hriatthiampui turin an tawng leh nunphung hriatchian a pawimawh a ni tiin, Mizo nunphunga tlawmngaihna pawimawhzia leh tawng thiam a tulziate a sawi.
AIS officer-te chu India ram phuarkhawmtu an nihna angin, an awmna hmun apianga mipuite hnam ziarang hriatthiam tum hmasa zel turin a chah a, he training kaltlang hian Mizo mipui tana rawngbawlna kawngah thil tha tak a chhuah ngei a beisei thu a sawi bawk.
Chief Secretary Khili Ram Meena pawhin non-Mizo AIS officer-te’n Mizo mipui nena inpawhna tha zawk an neih leh grassroot level administration tlo zawk an kenkawh theihna tura he training hi ruahman a nih thu a sawi a. Mizo society-a NGO leh Kohhran pawimawhnate, an inrelbawlna nghawng dante leh hriat tul hrang hrangte he training kaltlang hian an zir chhuah ngei a beisei thu a sawi.
He training hi October ni 8 atang ni 28, 2026 thleng (ni 14 chhung, ni khatah darkar 1 zel) neih tur niin, AIS Officer (IAS, IPS leh IFS) mi 41 tel tura ruahman a ni a, heng zinga mi 19-te chu district-a awm an nih avangin online-in an chhim thung ang.