Mizoramah chhiarpui 2027 thawh hnihna kalpui dan tur sawi ho niin, tun tumah hian raltlan leh caste census neih a ni dawn.
Chief Secretary Khilli Ram Meena kaihhruaiin Inrinni khan Secretariat Conference Hall-II, MINECO-ah Census official-te nen Census 2027 Phase-II kalpui dan tur chungchang sawi ho leh inhrihhriatna ‘One Day State Level Conference on Census’ neih a ni.
Phase-II ah hian Mizorama mipui awm zat inchhiarna (Population Enumeration) neih a nih dawn bakah raltlante pawh chhiar tel an ni dawn a, Chief Secretary chuan India ram policy leh Vikshit Bharat 2047 tihhlawhtlin kawnga data pawimawh tak a nih avangin uluk leh felfai taka kalpui a, Phase-I ang bawka Mizoram chu zo felfai hmasa ber nih leh tum tura chahin field level officer-te puih an inhuam reng thu a sawi.
Ruahman danin India ramah a vawikhatna atan online hmanga mahni inziahluh (Self-Enumeration) kalpui a ni dawn a, he he hna hi January 10 atanga January 24, 2027 thleng neih a nih hnuah January 25 atanga February 28, 2027 chhungin in tin tlawha inchhiarna (House to House Enumeration) neih a ni ang a, March 1 atanga March 5, 2027 chhungin ennawnna (Revision Round) neih a ni bawk ang.
He chhiarpuiah hian a vawikhatna atan Caste Census neih a ni dawn a, Mizorama Scheduled Caste 16 awmte chhinchhiah an nih bakah raltlante pawh chhiar tel an ni dawn a, amaherawhchu raltlante chhiar an nih avang hian India khua leh tui nihna an nei tihna a ni lo thung.
Aadhaar card number pe duh lo te tihluih tur an nih loh thu leh Special Intensive Revision 2026-a tel lo te pawh chhiar tel vek an nih tur thu tar lan a ni bawk.
Master Trainers, Field Trainers, Enumerator leh Supervisor-te training chu kumin November thla chhunga zawhfel hman tura ruahman niin, enumerator pakhatin mi 800 vel bawr an ziahluh theihna turin ruahmanna siam a ni a, he Phase-II kalpui a nihna tur atan hian sorkar laipui chuan Mizoram tan Rs vbc 19.19 a dah a ni.