Aizawl: Thawhtanni zing dar 7:30 vel khan Serchhip DEF, East Lungdar Beat Post leh North Vanlaiphai Police Station-te thawkhoin East Lungdar-ah Myanmar atanga tawlh ruk nia hriat kuhva rah bag tam tham tak leh a phurhna truck pathum an man.
Kuhva rah man tak hi bag 280 (kg 21,000) a tam niin, Rs nuai 63 man vel nia chhut a ni. Heng kuhva rahte hi truck hrang hrang pathuma phurh a ni a, a khalhtu mi pathumte pawh man nghal an ni.
Kuhva phurhna lirthei MZ-04-9575 khalhtu Lalnunpuia (30), Ruantlang hnen atangin kuhva bag 120 man a ni a. Lirthei MZ-01/N-6267 khalhtu John Langzathang (19), Champhai Vengthar leh lirthei MZ-02/A-8799 khalhtu Laldanmawia (19), Tlangsam-te hnen atangin kuhva bag 80 ve ve man a ni bawk.
Dan anga an chhui zui zel theih nan he thila inhnamhnawih driver pathum, an lirthei leh kuhva mante hi Customs Preventive Force, Keitum hnenah hlan an ni.