Aizawl: Mizo National Front (MNF) chu ram leh hnam tana belhtlak leh innghahna tlak political party awm chhun a ni tih Thawhtannia MNF Hnam Run chhung inkhawmah MNF Vice-President D. Thangliana, ex-MLA chuan a sawi.
D. Thangliana chuan India leh MNF inrem hnua sorkar hmasak ber tum khan harsatna chi hrang hrang leh party pensantu awm mah se, Pathian leh ram tana ding tlat hruaitute leh mipui an neih avangin hma an sawn leh zel tih a sawi a. Kum 2018–2023 MNF sorkar chhung khan Covid-19 hri leng leh budget dawn tur Rs vbc 2,371.90 hmuh loh avangin harsatna lian tak an tawk chungin, sorkar hmalakna avangin Covid avanga thi tlem ber an ni a. Chutih rualin harsatna kara sorkar pilot project SEDP hnuaiah Rs vbc 975 lai an sem chhuak thei chu Pathian leh hruaitute thawhrimna vang a nih thu a sawi bawk.
Manipur lama MNF party hotute an kal chungchang sawiin, Thangliana chuan Hmar, Paite leh Kuki-te inkara inrem lohna awm chu party chuan tha a ti lo tih a sawi a. Indo lai chauh ni lova zai khata luang zaa inpumkhat tura an ngenna chu Manipur lama hotute’n an lo dawngsawng tha hle a, October ni 23, 2026 khian inhmuhkhawm a hmalak ho an tum dawn tih a sawi.
MNF Vice-President chuan National Democratic Alliance (NDA)-ah awm mah se, MNF chuan ram leh hnam him lohna tur eng thil mah an thlawp ngai lo tih sawiin, MNF chu ram leh hnam zalenna tura kum 20 chhung lo che tawh, zui tlak party awm chhun a ni tih a sawi bawk.