Larsap General Vijay Kumar Singh chuan Thawhlehni khan 65th Subroto Cup 2026 Junior Girls (U-17)-a pahnihna dinhmun hauhtu Mizoram NCC U-17 Girls Football Team, Springfield Higher Secondary School, Aizawl-te chu Lok Bhavan-a Durbar Hall-ah chawimawina leh lawmpuina thilpek a hlan.
Larsap chuan intihsiakna ngaihhlut hlawh leh hautak tak maia Mizoram NCC U-17 Girls Football Team-te hlawhtlinna chu chhinchhiah tlak tak a nih thu leh an chhuanawm hle tih a sawi a. Champion nih loh avang erawh chuan hnual mai lo leh tlukchhiat phah nan hmang lo va, hlawhtlinna sang zawk chan nana hmang turin a fuih a ni.
Larsap chuan NCC chu nungchang tha, mahni inthununna leh ngaihtuahna dik tuh nana duan a nih avangin cadet-te chu midangte tana entawn tak nih tum tura fuihin, coaching staff, nu leh pa, zirtirtu leh NCC official-te thlawpna leh inpekna chu fakawm a tih thu a sawi a. Asian Games-a India hmeichhiate chet thatna te entirna atan hmangin infiamna huang hi huang zau tak a nih avangin harsatna leh chona awmte tha taka hmachhawn zel turin a chah bawk.
He hunah hian larsap chuan Mizoram NCC U-17 Girls Football Team, an Coach, Manager, Springfield Higher Secondary School Vice Principal leh NCC hotute hnenah memento, certificate leh lawmpuina thilpek a hlan a ni.