Aizawl: Health Minister Lalrinpuii chuan Thawhtanni chawhnu khan Sri Ramachandra Institute of Higher Education & Research, Chennai tlawhin, Mizoram atanga CSR leh Golden Card tangkawp kaltlanga a thlawna lung zai tur damlo mi pariat awm mekte chu an awmna ward-ah tlawhin an dinhmun a va ngaihven.
Minister Lalrinpuii chuan mahni sum sen ngai miah lova Mizorama damlo mi retheiten chhawmdawhna an dawng thei leh ta chu lawmawm a tih thu sawiin, damlo te chu doctor leh nurse-te thurawn tha tak a zawm zel turin a fuih a ni.
Heng damlo Chennai-a awm mekte hi thla hmasaa Sri Ramachandra Institute Cardiology Department-ten ZMC Falkawn-a a thlawna Free Cardiology Camp an rawn neihna atanga lung zai ngai zinga an hmuhchhuahte an ni a, tunah hian a zai tur batch hmasaber mi pariatte chu koh an ni.
Kum 2024 pawh khan a thlawna lung zaina hi buatsaih lo ni tawhin mi 33 hlawhtling taka zai an lo ni tawh a. Tun tumah hian damlo mi 35 tal zai leh theih an inbeisei a. A thlawna lung zaina senso zawng zawng hi Sri Shankara Heart Foundation CSR fund leh Ayushman Bharat (Golden Card) hmanga tum a ni a, damlo te tan hian an zinna man bakah an haw lam kalna senso thlengin an tumsak vek a ni.
Sri Ramachandra Institute atangin Trustee Smt. Samyuktha Venkatachalam, Prof. JSN Murthy, Dr. Lalthutiamngheti leh an thawhpuiten Health Minister hi an lo dawngsawng a. Minister chuan hetianga mi rethei te tana luangchhuak thin hospital changtlung tak an ni leh, Mizorama mi retheite pawhin an zar an zo thin chu lawmawm a tih thu sawiin, Sri Ramachandra Institute chungah lawmthu a sawi a, hma lam hunah pawh thawhhona tha zawk an neih zui zel a beisei thu a sawi bawk.