Tourism Minister Lalnghinglova Hmar chuan Mizoram Travel Fest 2026 leh ram chhunga khualzin hipna hmalakna hrang hrang chungchangah Thawhlehni khan Mizoram leh phai lam chanchinthar thehdartute tana press conference kovin, kumin chhung hian Mizoram mi cheng zat aia tam khualzin an rawn luh a beisei thu a sawi.
Minister chuan ni thum awh tur Mizoram Travel Fest 2026 chu bul tanna chauh a nih thu sawiin, kumin chhungin tourist kutpui lian zawk neih hmabak leh neih mek hrang hrang a awm thu a sawi a. Tuna neih mek Hnahsin Kut zawh hian Leitlangpui Music Festival buatsaih chhunzawm a ni dawn a, Tourism department hnuaia festival lian ber Winter Festival chu December 15-23, 2026 chhunga neih a ni ang. Winter Festival hnuaiah hian Tlaizawng Paradise Festival chu November 11, 2026-ah Phuaibuang-ah neih a ni dawn a, December 31-ah Sakawrhmuituai tlangah Sunset View neih a nih tur thu a sawi.
Phai lam chanchinbumite hnenah Minister chuan Sakawrhmuituai tlang chu India rama a kal tawh chinah ni tla mawina ber hmun a nih thu a sawi a, January ni 2, 2027 hian Darzo khuaah Chepa Nunchan entirna hun hman chhunzawm a nih tur thu a sawi bawk.
Lalnghinglova Hmar chuan August thla thleng khan kumin chhungin Mizoram tlawhtu mi nuai 6.7 an awm tawh thu leh September atanga December chhung hi tourist tam thla a nih avangin, kumin chhung hian Mizorama mi cheng zat aiin tlawhtu hi an tam zawk a beisei thu a sawi a. Tourist-te tana Inner Line Permit (ILP) leh Protected Area Permit (PAP) inkaihhruaina kawnga harsatna awm thin chungchangah hma lak mek a nih thu sawiin, ram pawn mi (foreigner) tana PAP chungchang chu sorkar laipui thuneihna a nih avangin Winter Festival atana tourist-te awlsam zawk nan Chief Minister Lalduhoma’n thuneitute pawh PAP lo thlahdul turin a ngen tawh tih a sawi bawk.