India-a Cockroach Janta Party (CJP) hruaitu lawk pahnih chu phal loh chunga Delhi-a lungawi lohna lantirhna hmun an luh luih avangin ni nga lung in tang tura tih an ni.
Saurav Das leh Ashutosh Ranka te hi police-ten lungawi loh lantirhna hmun atana an phal tawh lohna hmun, Jantar Mantar-a an kal luih avanga man an nih hnuah Nilaini khan magistrate hmaa hruai an ni.
Anni pahnih hi Thawhlehnia gate kalh lawn liama a hungna (barricade) paltlangtu eng emaw zat zinga mi an ni.
GenZ-te kaihhruai movement hian ram chhunga inthlan kalphung siam that leh vote tihchingpen awm nia sawi avangin Election Commission of India (ECI) chief bâng turin tun hnaiah an nawr nasa hle a ni.
Police chuan Das, Ranka leh anmahni zuitu activist Ajinkya Shinde-a chu phal lohnaa kal lui, muanna tichhia, khapna zawm lo leh sorkar thupek zawm lovah an puh a, anmahni chuan an pha thung.
Delhi-a Special Executive Magistrate Court chuan Das-a leh Ranka hi judicial custody-a ni nga awm turin a ti a, Shinde-a erawh personal bond nen an chhuah a. Hruaitu pahnihte hian court sang zawkah an khing let thei ang.
ECI kal dan duh lohna nasa taka lantir vetu tho, eptu hruaitu, Rahul Gandhi-a chuan man an ni hi a dem hle a, ‘dawihzepna lantirna’ tiin a sawi a, muanawm taka Jantar Mantar-a mahni thil phut lantir chu a thil thlawp a nih thu a sawi.
“Zirlai. Thalai. Chanchinbu mi. INDIA tangrual. Awmna inang lo, chhan pakhat. Kan duh erawh thuhmun a ni a: khua leh tuite hian hetiang ti tur hian danpui hnuaiah dikna an nei,” tiin X-ah a tar lang.
West Bengal leh Delhi chief minister hlui, Mamata Banerjee leh Arvind Kejriwal te telin eptu party hruaitu dangte pawhin X-ah CJP an thlawp thu leh an hruaitute man an ni chu an dem thu an sawi hlawm.
CJP dintu, a thiante man an nih hnua Delhi pan ve chiah, Abhijeet Dipke-a chuan sorkarin ‘official-a emergency puang’ turin Prime Minister Narendra Modi-a duh lova dodalte chu a paih thlain a man zel tih a sawi niin news agency PTI chuan a tar lang.
Dipke-a’n hemi a sawi hi kum 1970 chhova India-a emergency puan lai, Prime Minister Indira Gandhi-i kaihhruaina hnuaia vantlang zalenna a chep lai a sawina kha a ni.
CJP hi political party an ni lo va, Chief Election Commissioner (CEC) Gyanesh Kumar chu electoral roll ennawnah dan dik tawk lova chea ngaiin a bân an phut a, amah leh ECI chuan an pha thung.
Kartawpah khan Das, Ranka, Shinde leh Dipke te hi Jantar Mantar-a lungawi lohna lantir an tum laiin hren tura lak an ni tawh a. A hnuah magistrate-in a chhuah lehnghal hlawm thung.
Police chuan Delhi pumah venhimna thilah khuahkhirhna hrang hrang an kalpui a, metro station tam tak kharin police leh paramilitary force sang tel dahin mipuiin lungawi lohna lantira punkhawm an huaihawt tumna hmun an thlen theih loh nan an dang a. Chanchinbu mite telin mi sang tel man an ni a, a hnuah chhuah leh an ni hlawm a. Video thenkhatah chuan police hian tharumin mite hi bus-ah an nawr lut a ni.
Kartawpa nawrh huaihawtna boruak lian tak hnuah Delhi police chuan Jantar Mantar chu nawrhna hmun atan hman a phal tawh lo va, a aiah Ramlila Maidan, Burari Ground leh CBD Ground te chu a ruahman a ni.