P&E Minister F. Rodingliana hovin Nilaini khan Sumsuih rama Megawatt 5 (MW) tharchhuak thei tur solar plant siam mek tlawhin hnathawh dante an en fiah a. Department chuan solar leh hydel project atanga kawlphetha tharchhuahte chu chhun leh zana inbanleka hman a nih theih nan ruahmanna an siam a ni.
Sumsuih Solar Plant siamna sum hi NABARD-RIDF atanga hmuh Rs vbc 39.81 a ni a, tun dinhmunah he project hnathawh hi zaa 50 zawh a ni tawh a ni.
Minister chuan a rang thei ang bera kawlphetha tharchhuaka mipuite hman turin thawktute chu hma la turin a hrilh a. He hunah hian Mizoram sorkar ruahmanna sawiin, chhun lamah solar power hman a, zan lamah hydel project atanga kawlphetha tharchhuah hmanga inbanleka kalpui a nih tur thu a sawi a ni.
F Rodingliana sawi danin Mizoramah hian solar power tharchhuah tihpun chhoh mek zel a ni a. Tun dinhmunah Sumsuih (5 MW) bakah Vankal (20 MW), Thenzawl (10 MW) leh Tlungvel (2 MW) te atangin solar energy hman mek a ni a, sorkar leh private developer-te tangdunin MW 120 dang siam chhuahna tur hmalak mek a ni a. Hei bakah hian Grid-connected rooftop solar atangin MW 2.5 tharchhuah mek niin, tam zawk vuah a nih theih nan beihpui thlak mek zel a ni.
Zan lama kawlphetha mamawh phuhrukna turin Megawatt 24 tharchhuak thei tur Turini Hydel Project sak mek a ni a. Sorkar enkawl Hydel Project hrang hrang Kau Tlabung (3 MW), Teirei (3 MW), Khawiva (1.05 MW) leh Kawlbem (4 MW)-te chu tuikhuah an nih angin zan lama hman tur tui tam tak khawl tura duan an ni a. Heng tuikhuah bangte hi tisang tura buaipui mek niin, Khawiva leh Kau Tlabung te buaipui fel a nih hunah tui cubic meter 2,73,701 an khawl belh thei dawn a ni.
Rei lo te chhunga Tuivai Hydel Project (132 MW) lungphum tum a ni a, Tlawng Hydel Project (DPR ennawn mek) leh Tuichang Pump Storage Project (50 MW)-te pawh tihlawhtling tura hmalak zui mek a ni.