Aizawl: Mizoram Food & Allied Industries Corporation (MIFCO) Ltd. chuan kuthnathawktute thlai leh thei tharchhuah hmanga tin-a dah that (canned product) lakhuihthei, rawtuai leh baibing-te hralh chhuah theih tura phochhuahna hun a buatsaih.
Ningani khan I&PR Auditorium, Treasury Square, Aizawla hun hmana khuallian Dr. KC Lalmalsawmzauva, Adviser to Chief Minister (Handholding) chuan hun rei tak ata dinhmun duhawm lo leh thawmthat mamawh tak dinhmuna awm thin MIFCO Ltd. thawmthat a nih hnu a, kuthnathawktute tharchhuah hmanga product chi thum ngawt hralh theih tura phochhuah a ni chu lawmawm a tih thu a sawi a. Consumer-te tana itawm tura fun leh tuam mawi a pawimawh thu leh Bana Kaih scheme hnuaiah thlai thlan bik panga leina turin sorkar a inbuatsaih zel thu a sawi.
MIFCO General Manager H. Lalrochama report tar lan danin, Chhingchhip MIFCO Centre chu kum 15 chhung canned product siam thei lova a awm hnuah Handholding Scheme atanga Rs nuai 24 hmanga khawlte thawmthat a ni a; kum 2026 chhung hian baibing, lakhuihthei leh rawtuai tin 10,279 siam chhuah a ni.