Cricket khel ram zingah pawh a ropui bera chhal ngam leh atchilh ber ram, India-ah Mizoram team-in chanchin chhinchhiahtlak tak a siam a. Tual chhung inelna ngaihhlut ber, Ranji Trophy-ah hming a chher.
Nagaland nena Nagaland Cricket Stadium, Sovima-a Ranji Trophy Plate an khelh meka thawh (innings) khatnaah Thawhtanni khan Mizoram player Chinmay Sutar-a chuan thi lovin run 400 zet a siam a, kum 80 dawn hnua he inelnaa quadruple century siam thei pahnihna a ni.
Sutar-a hian wicket 10-naa a kawppui, vaw tura player lut hnuhnung ber, Lalrempuia nen run 190 zet an thawk chhuak dun a, hei pawh hi Ranji Trophy chanchina wicket hnuhnung bera batter pahnih inkawp run thawh chhuah tam ber pathumna a ni phak bawk.
Marema leh Sutar-a hi over 49 zet ding dunin Champhai tlangval hi bowler a ni a, run vaw chhuak lamah thawh hlawk tak angin lang lo mah se Sutar-a’n heti zat run a siam theih nan nghet takin a dinpui tlat a, a pawimawh hle a ni.
Mumbai tlangval kum 29 mi, Sutar-a hmaa Ranji Trophy-a innings khata run 400 siam tling thei awm chhun chu B.B Nimbalkar-a niin 1948-49 season daih tawh khan Maharashtra tana Kathiawar lakah 443* a siam a ni.
Ranji Trophy hi India-a tual chhung inelna ngaihhlut ber, Board of Control for Cricket in India (BCCI) hnuaia state/association mipa senior team inelna a ni a. Team tin hian state pawn player pathum theuh an la thei a, Sutar-a pawh hi Mizoramin tun season atana an lak zinga mi a ni.
Inkhel tum khat hi ni li khelh chhunga innings hnih khelh thin a ni a, Mizoram hian innings khatnaah hian run 581/9 siamin Nagaland-in a vaw ve mek a, he chanchin ziah lai hian mi pathum thi tawhin run 324 an siam mek a, Mizoram dinhmun a tha rih hle.