Aizawl: Education Minister Dr Vanlalthlana’n Thawhlehni khan BSI Hall, Khatla-ah zirna lam hawi lehkhabu thar, ‘Development and the Tribal Question in India’ tih a tlangzarh.
Tlangzarh inkhawmah Dr. Vanlalthlana chuan ram hmasawnna leh industry siam chhuanlama tribal-te ram laksak an nih thin thu sawiin, tuikhuah lian te, lungalhthei laihchhuahna leh factory siam nan te hman a nih avangin mipui tam takin an dikna chanvo an hloh phah thin a. Hei hian hnam zia leh nihna hloh theihna dinhmun hlauhawmah a dintir thin thu a sawi.
Dr. Vanlalthlana chuan academician leh researcher-te chu sorkar thiltih dem ngawt lo va, zirna huangah leh thil dangah pawh sorkar pui tur leh, theihtawp chhuaha rawtna tha thehlut thin turin a chah a ni.
Lehkhabu tlangzarh tak hi mi thiam pahnih, Prof. (Retd.) Virginius Xaxa leh Dr. Roluahpuia, Associate Professor, IIT Roorkee te tangkawp buatsaih a ni a. Lehkhabu tlangzarh a nih hnu hian a bu chhunga thu awmte hi sawiho zui nghal a ni.