Aizawl: Power & Electricity Minister F. Rodingliana chuan Ningani khan Mizoram power-a a intodelh theih nana hmalakna pawimawh tak, Khawzawl district-a Tuichang Pump Storage Plant sakna tur hmun a tlawh.
Tuichang Pump Storage Plant hi Open Loop Pump Storage Plant tura ruahman a ni a, Vankal Solar Plant atanga km 5 vela hla a nih avangin transmission loss awm lovin power siam chhuah a dah khawl theih dawn a ni. Project atan hian Vankal khuaa Pi lui-ah upper reservoir siam a ni ang a, lower reservoir hi Tuichang-ah siam a ni ang.
DC Conference Hall-ah Khawzawl District Head of Office-te nen an thutkhawmah Minister chuan, Khawzawl district-a sorkar department-te an changtlung hle tih sawiin, department hotute chu sorkar kut leh ke leh ram siam tura hmanrua an nih avangin thingtlang kil thlengin mipuite harsatna chhui chhuaka ram hmasawnna tura theihtawp chhuah zel turin a chah.