Aizawl: Ex-Servicemen-te leh an chhungten sum chawi ngai lova (cashless) damdawi in an dawr theih nan Ex-Servicemen Contributory Health Scheme (ECHS) leh Civil Hospital Aizawl-te chuan Ningani khan Senior Medical Superintendent Office, Civil Hospital Aizawl-ah thawhhona thuthlung an ziak.
He MoA ziah a nih tak avang hian ECHS member-te (Army, Navy, Air Force, Assam Rifles, Coast Guard leh Territorial Army) chuan Civil Hospital Aizawl-a inenkawlna senso zawng zawng chu cashless-in an sum chawi miah lovin an hmang thei tawh dawn a ni. He hmalakna hi Mizoram chhunga awm Ex-Servicemen-te leh an chhungte mi 13,000 bawr velin hmang tura ngaih a ni.
He thawhhona thuthlung hi Civil Hospital Aizawl Senior Medical Superintendent Dr. Lalchhuankimi leh Aizawl Military Station Commander Colonel Siddharth Chaki ten an ziak a ni.
ECHS hian hetiang thawhhona thuthlung hi Aizawl leh a chhehvela damdawi in dang pali – ZMC&H, MSCI, Synod Hospital Durtlang leh Aizawl Hospital & Research Centre-te nen an lo ziak fel tawh bawk.