Mana Motors chuan kum hmasa aia huam zau zawkin Inrinni khan ‘The Great Escape’ an buatsaih a, an lirthei zawrh leitute chungah lawmthu an sawi.
Mizorama Mahindra full range dealer Mana Motors hian lirthei ke li nei, sumdawn nana hman chi leh mi mal hman chi an zuar a, kuminah hmasawnna chhinchhiahtlak tak tak neiin hemi denchhen hian changtlung zawkin ‘The Great Escape’ an buatsaih.
Kumin January atanga October 25 thlengin India-a lirthei hralh chhuah zat chhinchhiahna, Vahan-ah 2,000 deuhthaw an ziak lut tawh a. May khan 281 ziak lutin a vawi khat nan thla khat chhunga Mizorama lirthei ke li nei zuar zinga ziak lut tam ber an ni a, July khan 237 tlinin ziak lut hnem ber an ni bawk.
Zing dar 10:30-ah Mahindra Head Office, Mumbai atanga tel, Satinder Kumar-a’n Falkland, Aizawlah a vai liam a, mi mal hman chi Mahindra lirthei chi hrang hrang an inzui a. Hmuifang tlangah kawng chhiaa intlansiak, silai inkahsiak leh inelna hrang hrang bakah naupang intihhlimna an buatsaih a, tlai lam atangin Shai Hills Live Band nen zan thlengin hun an hmang.
‘The Great Escape’ hi tlangram kawng chhengchhia leh kawng nâlah Mahindra lirthei a hman tlak tih pho lanna a ni ber a, lirthei 40/50 vel telin mi 100 vel an pung khawm a. Nikum khan 25 vel thawk chhuakin Sialsuk tlangah mi 50 velin hun an hmang a ni.
Dearler Principal Dr Franklin Lalrinngheta chuan lawmthu sawiin an lirthei leitute ngaihsak zui chu an ngaih pawimawh a nih thu a sawi.