India khawchhak lama vaukam hrul state pahnihah Cyclone Arnab thawk tur avangin mi sang tel insaseng tura inbuatsaihna kalpui mek a ni.
Arnab hian Nilaini tukah khawmual a kai dawn a, district thenkhatah chuan ni hnih chhung sikul chawlh puan a ni tawh.
Bay of Bengal-a thlivir insiam hi insiam chak zelin tunah chuana cyclonic storm a ni tawh a, Andhra Pradesh vaukamah darkar khata km 140 thlenga chak thlipui keng chungin Nilaini tuk hian khawmual a lut dawn niin India-a weather office chuan a chhut lawk.
Cyclone hi tuna a dinhmun mek aia chakin a la insiam thei niin an sawi bawk.
Arnab hian thli chak tak bakah Andhra Pradesh hmar lam leh lailia vaukam hrul district-ah ruah tam tak a thlen dawn a. An thenawma Odisha chhim lam district-ah pawh ruah a tam hle dawn bawk niin Indian Meteorological Department (IMD) chuan a sawi lawk.
Andhra Pradesh-a thuneitute chuan tuipuia awm mek lawnglengte chu khawmuala inkhalh chhuak turin an ti a, power supply-ah harsatna a awm palh thuta rang taka siam tha thei turin inbuatsaihna kalpui a ni bawk.
Andhra Pradesh disaster management-a hotu sang pakhat chuan state sorkarin mi 5,70,000 vel dinhmun hlauhawma ding an awm niin an sawi a, Thawhtanni zan atangin hmun hima saseng turin an inbuatsaih tih a sawi.
Odisha-ah pawh Thawhlehni leh Nilaini hian district pangaah sikul leh college chawlh puan a ni a, hmun hniam deuh laia awm tam tak chu hmun hima insuan chhuak turin inbuatsaihna kalpui a ni bawk.
Bay of Bengal hi tropical cyclone insiam duhna hmun tak a ni a, kum tin thawk na tak tak insiamin khawmual a kai fo thin a ni.