Aizawl: Mizoram Journalists Association (MJA) member, October 26 atanga 30, 2026 chhunga ‘Exposure Tour to Meghalaya’-a kal turte chu Thawhtanni khan Tuikual South-a Horticulture Directorate pisa tual atangin Horticulture Director CH. Lalmuanpuia’n a vai liam.
Horticulture Director CH. Lalmuanpuia chuan MJA nen tun hma atanga thawhdunna tha tak an lo neih tawh thu sawiin, department hmalaknate mipui hriata an lo puanzar sak thin avangin lawmthu a sawi a. He tour hi Meghalaya sorkarin kuthnathawktute tana hmalakna hrang hrang a neih te zirchiang a, chung a tihtheih tha leh hmasawnna tur awmte chu Mizorama kalpui ve dan tur te, hmasawn zawk a ngaihna laia hma lak dan tur zir chiang tura buatsaih a nih thu a sawi a. Meghalaya-a an cham chhungin nuam tak leh hlawk taka hun hmang turin duhsakna a hlan nghal bawk.
Exposure Tour vai liamna hunah hian Horticulture Addl. Director Lucy Zaithangpuii, MJA President Vanlalrema Vantawl leh MJA hruaitu dangte pawh an tel a ni.
He Exposure Tour-ah hian MJA member 10 an kal a. Chungte chu Zohmingmawia (Aizawl Post), Lalbiakzama (Entlang), F. Lalrinfela (Zalen), T. Lalbiakdika (Zawlbuk), Lalnunzira Chawngthu (DDK), Lal Rinmawia (Vanglaini), Vanlalbiaka (Aizawl Observer), Lalchhanhima (LPS), Caroline Lalrosangi (DDK) leh Zorinpuii Hlawndo (Zonet) te an ni a. Anni hi Horticulture Department atangin Peter Lalramhluna, Serchhip District Project Officer-in a hruai a ni.