Aizawl: Chief Minister Lalduhoma chu a taksa a hah lutuk leh a rimtawng avangin doctor-te thurawn angin ni eng emaw ti chhung inah a chawl hahdam dawn.
Sorkar thuchhuahin a tar lan danin Inrinni atang khan a taksa a chauh deuh avangin inentirin doctor-ten an endik hnuah taksa natna dang leh thil fel lo engmah hmuh a ni lo a, a rimtawng mai a ni tih hriat a ni.
Chief minister hi office leh a zin veivahna hmun hrang hrangah mipuite nen an inhmukhawm deuh reng a, ni tin programme hrang hrang hmachhawn thinin zan lam leh hunawlah te e-office hmangin file-te a en zui thin a ni. Hetianga hun hmang thin anih avang hian doctor-te chuan hahdam taka awm rih turin thurawn an pe a ni.
A programme duan lawksate chu cancel vek a ni a, vawiin programme-te pawh loh theih loh chauh lo chu thulh a ni ang. A programme kaihhnawih official leh mipuite hriattir zui zel an ni ang.
Chief minister-in hahdam taka hun a hman theih nan in lama a awm chhung hian phone-a biak, message thawn leh amah hmuh tuma pan rih lo turin mipui ngen an ni.